Хусусий секторни ривожлантириш бўйича ислом корпорацияси (ХСРИК) делегацияси амалий ташриф билан «Uzbek Leasing International A.O» офисида бўлди
ХСРИК делегациясининг таркиби:
- жаноб Муҳаммад Аламий (Mohammed Alyami), Бош директор, Ривожланиш самарадорлиги бўлими;
- жаноб Талал Карим Алобайд (Talal Karim Alobayd), Мониторинг ва баҳолаш бўйича менежер;
- жаноб Мунир Жуанеди (Mounir Jouanedy), Коммуникациялар ва маркетинг бўйича етакчи мутахассис;
- жаноб Абдулла Аль Ахмадий (Abdullah Al-Ahmadi), Маълумотлар ва дастурлар маркетинги бўйича мутахассис.
2024 йил 14 октябрь куни “ Uzbek Leasing International A.O.” АЖ офисида Хусусий секторни ривожлантириш бўйича Ислом корпорацияси (ХСРИК) делегацияси билан музокаралар бўлиб ўтди. Ташриф давомида лизинг компаниясининг бош директори Мустафоев Зафаржон меҳмонларга компаниянинг иш жараёнларини намойиш қилиб, янги офисни кўрсатди.
Музокаралар чоғида томонларнинг жорий ютуқлари ва келгусидаги ҳамкорлик режалари муҳокама қилинди. Томонлар кўп йиллик муваффақиятли ҳамкорликка, шунингдек, Ўзбекистонда кичик ва ўрта бизнесни қўллаб-қувватлашга эътибор қаратдилар.
“ Uzbek Leasing International A.O.” компаниясининг ХСРИК билан ҳамкорлиги 2008 йилда бошланган, ўтган давр мобайнида умумий қиймати 28 миллион АҚШ долларига тенг бўлган 4 та молиялаштириш йўналиши олинди, бу лизинг компаниясининг имкониятларини сезиларли даражада кенгайтирди ва мамлакатимизда кичик ҳамда ўрта корхоналар лойиҳаларини молиялаштириш имкониятини оширди. Шунингдек, Исломий маҳсулотларни молиялаштириш учун ХСРИКдан 5 миллион АҚШ доллари миқдоридаги 5-йўналиш кутилмоқда.
ХСРИК кўмагида “ Uzbek Leasing International A.O.” 2022 йилда исломий дарчани, шунингдек, исломий молиявий маҳсулотлар – Ижара ва Муробаҳани ҳам жорий этди. Ушбу дастур доирасида ХСРИК техник ёрдам кўрсатди ва ходимларимизни исломий молия бўйича ўқитди, бу бизга мижозларга янги исломий маҳсулотларни таклиф қилиш ва бозордаги ўрнимизни мустаҳкамлаш имконини берди.
Музокараларга қўшимча равишда, ХСРИК делегацияси Тошкент шаҳрида, Тошкент ва Самарқанд вилоятларида компаниямиз томонидан ХСРИК линияси орқали молиялаштирилган бир қанча муваффақиятли лойиҳаларга ташриф буюради.
Хусусий секторни ривожлантириш бўйича ислом корпорацияси (ХСРИК) кўп томонлама ривожланиш бўйича молиявий институт бўлиб, Ислом тараққиёт банки (ИТБ) гуруҳининг аъзоси ҳисобланади. ХСРИК 1999 йил ноябрь ойида аъзо мамлакатлардаги хусусий сектор лойиҳаларини молиялаштириш, рақобат ва тадбиркорликни ривожлантириш ҳамда трансчегаравий сармояларни рағбатлантириш орқали аъзо мамлакатларнинг иқтисодий ривожланишини қўллаб-қувватлаш мақсадида ташкил этилган. ХСРИК шунингдек, исломий молияни ривожлантиришга кўмаклашувчи, ҳаммолиячиларни жалб қилувчи ва бозор иқтисодиётининг ролини оширувчи лойиҳалар учун қўшимча ресурслар ажратади. ХСРИК ИТБнинг аъзо мамлакатлардаги фаолиятини, шунингдек, миллий молия институтлари фаолиятини тўлдиради.
